ଧର୍ମଶାଳା : ଜମି ବାଡି ମାପକୁ କେନ୍ଦ୍ର କରି ଦାଦାର ଆକ୍ରମଣରେ ପୁରୁତୁରା ଗୁରୁତର ଆହତ ହୋଇ କଟକ ବଡ ମେଡିକାଲରେ ଚିକିତ୍ସିତ ହେଉଥିବା ବେଳେ ଆଜି ବ୍ରହ୍ମବରଦା ପୋଲିସ ୯୮/୨୩ରେ ଏକ ମାମଲା ରୁଜୁ କରି ଘଟଣାର ତଦନ୍ତ କରି ଅଭିଯୁକ୍ତ ଦାଦା କେଦାର ନାୟକକୁ ଗିରଫ କରି କୋର୍ଟ ଚାଲାଣ କରାଯାଇଥିବା ନେଇ ଏସ୍ଆଇ ବିଭୁତି ଭୂଷଣ ମହାପାତ୍ର ସୂଚନା ଦେଇଛନ୍ତି ।
ସୂଚନା ଥାଉକି, ରବିବାର ଦିନ ରସୁଲପୁର ବ୍ଲକ ବ୍ରହ୍ମବରଦା ପଂଚାୟତସ୍ଥ ନାୟକ ସାହି ଗ୍ରାମରେ ନିହାର ନାୟକ ଓ କେଦାର ନାୟକ ଉଭୟ ପରିବାର ମଧ୍ୟର ଜମି ମାପ ଚାଲିଥିଲା । ଏଥିରେ ଉତ୍ୟକ୍ତ ହୋଇ କେଦାର ଏକ ଲୁହା ପାଇପରେ ନିହାରଙ୍କ ପୁଅ ଶକ୍ତି ପ୍ରତାପଙ୍କ ମୁଣ୍ଡରେ ଶକ୍ତ ପ୍ରହାର ଦେଇଥିଲା । ଫଳରେ ଶକ୍ତି ଗୁରୁତର ଆହତ ହୋଇ ପ୍ରଥମେ ଯାଜପୁର ଓ ପରେ ଅବସ୍ଥା ଗୁରୁତର ହେବାରୁ କଟକ ବଡ ମେଡିକାଲକୁ ସ୍ଥାନାନ୍ତରିତ କରାଯାଇଥିଲା । ଗୁରୁତର ଶକ୍ତିର ମାଆ କୁମୁଦିନୀ ଏନେଇ ରବିବାର ସନ୍ଧ୍ୟାରେ ଥାନାରେ ଏତଲା ଦେଇଥିଲେ । ଏତଲାକୁ ଭିତି କରି ପୋଲିସ ଘଟଣାର ତଦନ୍ତ କରିବା ସହ କେଦାରକୁ ଥାନାକୁ ଆଣି ପଚରାଉଚୁରା କରିଥିଲା । ତେବେ ଆଜି କେଦାରକୁ କୋର୍ଟ ଚାଲାଣ କରାଯାଇଥିବା ଜଣାପଡିଛି ।
