ଧର୍ମଶାଳା : ଯାଜପୁର ଜିଲ୍ଲା ବିଞ୍ଝାରପୁର ଥାନା ଅନ୍ତର୍ଗତ ସିଂହପୁର ନିକଟସ୍ଥ ଖରସ୍ରୋତା ମହାବିଦ୍ୟାଳୟ ନିକଟରେ ଥିବା ଦରିଆ ନାହାକାଣି ନାଳରୁ ଆଜି ସକାଳେ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି । ତାଙ୍କ ବେକରେ ପ୍ଲାଷ୍ଟିକ୍ ରଶି ବନ୍ଧାଯାଇଥିବା ଦେଖିବାକୁ ମିଳିଛି । ଯାହାକୁ ନେଇ ତାଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ପରିବାର ଲୋକ ଅଭିଯୋଗ କରିଛନ୍ତି ।
ଆଜି ସକାଳେ ସ୍ଥାନୀୟ ଲୋକ ଘଟଣା ବାବଦରେ ଜାଣିବା ପରେ ମୃତକ ପ୍ରିୟରଞ୍ଜନ ଧଳ (୪୦)ଙ୍କ ପରିବାର ଲୋକଙ୍କୁ ଖବର ଦେଇଥିଲେ । ପ୍ରିୟରଞ୍ଜନଙ୍କ ଦାଦା ଦେବେନ୍ଦ୍ର ଏନେଇ ବିଞ୍ଝାରପୁର ଥାନାରେ ଏତଲା କରିଥିଲେ । ଏତଲାକୁ ଭିତି କରି ପୋଲିସ ଏ ସଂକ୍ରାନ୍ତରେ ଏକ ମାମଲା ରୁଜ୍ଜୁ କରିଛି । ଘଟଣାସ୍ଥଳରେ ପହଂଚି ପାରିପାର୍ଶ୍ଵିକ ସ୍ଥିତିର ଅନୁଧ୍ୟାନ କରିବା ସହ ଶବ ଜବତ କରି ବ୍ୟବଚ୍ଛେଦ ନିମନ୍ତେ ଯାଜପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଛି । ପୋଲିସ ପକ୍ଷରୁ ଏନେଇ ଅଧିକ ତଦନ୍ତ ଜାରି ରହିଛି ।
