ଚାଇବାସା (ପଶ୍ଚିମ ସିଂହଭୂମ) : ଓଡିଶାର ସୀମାନ୍ତ ଝାରଖଣ୍ଡର ପଶ୍ଚିମ ସିଂହଭୂମ ଜିଲ୍ଲାରେ ନକ୍ସଲ-ସୁରକ୍ଷାକର୍ମୀ ମୁହାଁମୁହିଁ ହୋଇଛନ୍ତି । ଉଭୟଙ୍କ ମଧ୍ୟରେ ଗୁଳି ବିନିମୟ ଯୋଗୁ ୨ଜଣ ଯବାନ୍ ଆହତ ହୋଇଛନ୍ତି । ଆହତ ଦୁଇଜଣ ଯବାନ ହେଲେ ସିଆରପିଏଫ ୬୦ ବାଟାଲିୟନର ସୁଶାନ୍ତ କୁମାର ଓ ମୁନ୍ନା । ସୁଶାନ୍ତଙ୍କ ଗୋଡରେ ଗୁଳି ଲାଗିଥିବା ବେଳେ ମୁନାଙ୍କର ଛାତିରେ ବାଜିଛି ଗୁଳି । ଆହତ ଯବାନଙ୍କୁ ତୁରନ୍ତ ମେଡିକାଲରେ ଭର୍ତ୍ତି କରଯାଇଥିବା ବେଳେ ଅଧିକ ଚିକିତ୍ସା ପାଇଁ ରାଞ୍ଚି ପଠାଇ ଦିଆଯାଇଛି ।
ସୂଚନା ଯୋଗ୍ୟ, ଗୋଇଲଗେରା ଥାନା ଅନ୍ତର୍ଗତ ହୁସିପି ଗାଁରେ ସିଆରପିଏଫ ଯବାନଙ୍କ ପକ୍ଷରୁ ସର୍ଚ୍ଚ ଅପରେସନ କରାଯାଉଥିଲା । ଏହି ସମୟରେ ନକ୍ସଲମାନେ ସୁରକ୍ଷାକର୍ମୀଙ୍କ ଉପରକୁ ଗୁଳି ଚଳାଇଥିଲେ । ତେବେ ପୋଲିସ ଓ ସୁରକ୍ଷାକର୍ମୀ ଏହାର ପାଲଟା ଜବାବ୍ ଦେଇ ଫାୟାରିଂ କରିଥିଲେ । ଉଭୟଙ୍କ ମଧ୍ୟରେ ଗୁଳି ବିନିମୟ ଜାରି ରହିଥିଲା । ଏହି ଗୁଳି ବିନିମୟରେ ୨ଜଣ ଯବାନ ଆହତ ହୋଇଛନ୍ତି । ଗୁଳି ବିନିମୟ ପରେ ସ୍ଥାନୀୟ ଅଞ୍ଚଳରେ ସର୍ଚ୍ଚ ଅପରେସନକୁ ଜୋରଦାର କରାଯାଇଛି ।
