ଭୁବନେଶ୍ୱର : ଓଡ଼ିଶାର ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନିଜ ଦଳର କର୍ମୀଙ୍କୁ ଉତ୍ସାହିତ କରିବା ପାଇଁ ଯେଉଁ ମନ୍ତବ୍ୟ ଦେଇଛନ୍ତି, ତାହା ତାଙ୍କ ଦଳ ପ୍ରତି ଆସ୍ଥା କମୁଥିବା ଦର୍ଶାଉଛି । ମୁଖ୍ୟମନ୍ତ୍ରୀ ବିରୋଧୀ ମାନଙ୍କୁ ଜନବିରୋଧୀ କହି ଆକ୍ଷେପ କରିଛନ୍ତି, ଯାହା ଗଣତନ୍ତ୍ର ପାଇଁ ଠିକ୍ ନୁହେଁ ବୋଲି ଟ୍ୱିଟ୍ କରି କହିଛନ୍ତି ପୂର୍ବତନ ରାଜ୍ୟ ବିଜେପି ସଭାପତି ସମୀର ମହାନ୍ତି ।
ମହାନ୍ତି ଟ୍ୱିଟ୍ କରି କହିଛନ୍ତି ରାଜନୀତିରେ କେବଳ ନିର୍ବାଚନ ଜିତିବା ସବୁ କିଛି ନୁହେଁ, ଲୋକଙ୍କ ସେବା ହିଁ ସର୍ବୋପରି । ୨୦୧୯ ସାଧାରଣ ନିର୍ବାଚନରେ ଓଡ଼ିଶାର ଜନସାଧାରଣ ବିଜେଡ଼ିକୁ ୪୪.୮ ପ୍ରତିଶତ ଭୋଟ୍ ଦେଇଥିଲା ବେଳେ ବିରୋଧୀ ମାନଙ୍କୁ ଅନୁରୂପ ଭାବରେ ବିଜେଡି ସରକାର ବିରୋଧରେ ୪୯.୩ ପ୍ରତିଶତ ଭୋଟ୍ ଦେଇଛନ୍ତି । ଓଡ଼ିଶାବାସୀ ବିଜେପିକୁ ଗତ ସାଧାରଣ ନିର୍ବାଚନରେ ୯୧ ଲକ୍ଷରୁ ଉର୍ଦ୍ଧ୍ୱ ଭୋଟ୍ ଦେଇଛନ୍ତି । ବିରୋଧୀ ଦଳର ଭୂମିକା ବିଜେପିକୁ ମିଳିଛି । ଆପଣଙ୍କ ଅହଙ୍କାର ଆଜି ଚରମ ସୀମାରେ । ଦିନେ ଶାସନରେ ରହିବାର ଅହଙ୍କାର ଦୁର୍ଯ୍ୟୋଧନ ଓ ରାବଣର ଥିଲା ।
ମହାପ୍ରଭୁ ଶ୍ରୀଜଗନ୍ନାଥ ଓ ଶ୍ରୀଲିଙ୍ଗରାଜ ମନ୍ଦିରର ଉନ୍ନତି ଉପରେ ବିରୋଧୀ ବାଧା ସୃଷ୍ଟି କରୁଥିବା ନେଇ ଆପଣ ଯେଉଁ ଆରୋପ ଲଗାଇଛନ୍ତି, ତାହା ସମ୍ପୂର୍ଣ୍ଣ ଭୁଲ । ଆପଣ ଓ ଆପଣଙ୍କ ସରକାର ମଠ ମନ୍ଦିର ବିରୋଧୀ । ସୌନ୍ଦର୍ଯ୍ୟୀକରଣ ନାଁରେ ଆପଣ ହଜାର ହଜାର ବର୍ଷ ତଳର ମଠ, ମନ୍ଦିରକୁ ଭାଙ୍ଗି କେବଳ ଟାଇଲ ଓ ଗଛ ଲଗାଉଛନ୍ତି । କୋଭିଡ୍ ସମୟରେ ରଥଯାତ୍ରାକୁ ବନ୍ଦ କରିବା ପାଇଁ କେଉଁମାନେ ଷଡଯନ୍ତ୍ର କରିଥିଲେ? ଓଡ଼ିଶାର ଓଡ଼ିଆ ଲୋକଙ୍କ ଦାବି ସତ୍ୱେ ରତ୍ନଭଣ୍ଡାର ନ ଖୋଲିବା ପାଇଁ ଆପଣ ମସୁଧା କରିଛନ୍ତି । ଯେଉଁ ରାଜ୍ୟର ମୁଖ୍ୟମନ୍ତ୍ରୀଙ୍କ ପୁଅ ଉଦୟନିଧି ଷ୍ଟାଲିନ ସନାତନୀ ଧର୍ମକୁ ଗାଳି ଦେଇଥିଲେ ଓ ଧର୍ମକୁ ନମାନିବା ପାଇଁ କହିଥିଲେ, ସେହି ବ୍ୟକ୍ତିଙ୍କୁ ଓଡ଼ିଶା ଗସ୍ତ ସମୟରେ ଆପଣ ଯେଉଁଭଳି ଭାବେ ଅତିଥି ଚର୍ଚ୍ଚା କଲେ, ଏଥିରୁ ଜଣାପଡୁଛି ଆପଣ ସନାତନ ବିରୋଧୀ ନା ସପକ୍ଷବାଦୀ?
ଶ୍ରୀ ମହାନ୍ତି ଟ୍ୱିଟ୍ କରିଛନ୍ତି ଯେ, ପରମପୂଜ୍ୟ ଜଗତଗୁରୁ ଶଙ୍କରାଚାର୍ଯ୍ୟ ଏବଂ ଗଜପତି ମହାରାଜଙ୍କ ପରାମର୍ଶ କୁ କର୍ଣ୍ଣପାତ ନକରିବା ଦୁଃଖର ବିଷୟ । ରାଜ୍ୟରେ ସ୍କୁଲ ମାନଙ୍କରେ ରଙ୍ଗ ବୋଳିଲେ ଶିକ୍ଷାର ବିକାଶ ହୁଏ ନାହିଁ । ଛାତ୍ରଛାତ୍ରୀଙ୍କ ଭବିଷ୍ୟତ ଗଢୁଥିବା ଶିକ୍ଷକ ଶିକ୍ଷୟିତ୍ରୀମାନଙ୍କ ସହ ବିଭିନ୍ନ ସଂଗଠନର ଲକ୍ଷ ଲକ୍ଷ କର୍ମଚାରୀ ଆଜି ଭୁବନେଶ୍ୱରର ରାଜରାସ୍ତାରେ ଧାରଣାରେ ବସିଛନ୍ତି । ରାଜ୍ୟର ସ୍ୱାସ୍ଥ୍ୟାବସ୍ଥା ବିପର୍ଯ୍ୟସ୍ତ । କଟକ ବଡ ମେଡିକାଲରେ ଦୀର୍ଘ ୧୮ ଘଂଟା ଧରି ବିଜୁଳି କାଟ ହେଉଛି । ଭାରତ ସରକାରଙ୍କ ଆୟୁଷ୍ମାନ ଭାରତ ଯୋଜନାକୁ ଓଡ଼ିଶାରେ ଲାଗୁ କରୁ ନାହାନ୍ତି । ଲୋକଙ୍କ ସେବା ପରିବର୍ତେ ଆପଣ ଲୋକଙ୍କୁ ଭ୍ରମିତ କରି ଦିନରେ ଲଣ୍ଠନ ଦେଖାଉଛନ୍ତି ବୋଲି ପୂର୍ବତନ ରାଜ୍ୟ ସଭାପତି ଟ୍ୱିଟ୍ କରିଛନ୍ତି ।
