ନୂଆଦିଲ୍ଲୀ : ଜି-୨୦ ରାଷ୍ଟ୍ର ସମୂହର ଦୂରଦୃଷ୍ଟିସମ୍ପନ୍ନ ନେତୃତ୍ୱ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଗଭୀର କୃତଜ୍ଞତା ଓ ଆନ୍ତରିକ ଧନ୍ୟବାଦ ଜଣାଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଭାରତର ‘ବସୁଧୈବ କୁଟୁମ୍ବକମ୍’ର କାଳଜୟୀ ଭାବନାକୁ ଦୃଷ୍ଟିରେ ରଖିବା ସହିତ ଏହି ଏକ ପୃଥିବୀରେ ଏକାଠି ରହୁଥିବା ଏକ ପରିବାର ପାଇଁ ସହଭାଗୀ ଭବିଷ୍ୟତ ସୁନିଶ୍ଚିତ କରିବା ଲାଗି ମାନବ-କେନ୍ଦ୍ରୀତ ଆଭିମୁଖ୍ୟ ଆପଣାଇଥିବାରୁ ପ୍ରଧାନମନ୍ତ୍ରୀ ମୋଦୀଙ୍କୁ କେନ୍ଦ୍ର ମନ୍ତ୍ରୀ ପ୍ରଶଂସା କରିଛନ୍ତି । ଆଫ୍ରିକୀୟ ସଂଘ (ଏୟୁ)କୁ ଏହି ସମ୍ମାନଜନକ ଗୋଷ୍ଠୀରେ ସଫଳ ଭାବେ ଅନ୍ତର୍ଭୁକ୍ତ କରିବା, ଜି-୨୦କୁ ପ୍ରକୃତରେ ସମସ୍ତଙ୍କ ପ୍ରତିନିଧିତ୍ୱ ଆଧାରିତ କରିବା ଏବଂ ଦକ୍ଷିଣ ବିଶ୍ୱର ସ୍ୱରକୁ ଶକ୍ତି ପ୍ରଦାନ କରିବାରେ ଭାରତର ନେତୃତ୍ୱ ମାଧ୍ୟମରେ ଏହି ସମାବେଶୀ ଦୃଷ୍ଟିକୋଣ ସାକାର ହୋଇଛି। ଗଣମାଧ୍ୟମକୁ ଏକ ବିବୃତ୍ତିରେ ପ୍ରଧାନ କହିଛନ୍ତି ଯେ ସହମତି, ସହଭାଗିତା ଏବଂ ସହଯୋଗ ଆଧାରରେ ବିଶ୍ୱ ବ୍ୟବସ୍ଥାରେ ପରିବର୍ତ୍ତନ ପାଇଁ ଭାରତର ଅଧ୍ୟକ୍ଷତାକୁ ପ୍ରଶଂସା କରାଯାଉଛି।
ଜି-୨୦ ଅଧୀନରେ ଶିକ୍ଷାଗତ ପ୍ରାଥମିକତା ସମ୍ପର୍କରେ ପ୍ରଧାନ କହିଛନ୍ତି ଯେ, ନୂଆଦିଲ୍ଲୀ ନେତାଙ୍କ ଘୋଷଣାନାମାରେ ମୌଳିକ ସାକ୍ଷରତା ଏବଂ ସଂଖ୍ୟାବିଜ୍ଞାନ (ଏଫ୍ଏଲ୍ଏନ୍), ପ୍ରଯୁକ୍ତି ପରିଚାଳିତ ଶିକ୍ଷା, ଆଜୀବନ ଶିକ୍ଷା ପାଇଁ ଦକ୍ଷତା ବୃଦ୍ଧି ଏବଂ କାର୍ଯ୍ୟର ଭବିଷ୍ୟତ ଏବଂ ସହଯୋଗ ମାଧ୍ୟମରେ ଗବେଷଣା ଓ ଉଦ୍ଭାବନକୁ ସୁଦୃଢ଼ କରିବା ଭଳି ଗୁରୁତ୍ୱପୂର୍ଣ୍ଣ କ୍ଷେତ୍ର ଉପରେ ବିଚାରବିମର୍ଶକୁ ପ୍ରାଥମିକତା ଦିଆଯାଇଛି । ଶିକ୍ଷା ମାଧ୍ୟମରେ ଏକ ସମାନତାପୂର୍ଣ୍ଣ ଏବଂ ଦୀର୍ଘସ୍ଥାୟୀ ଭବିଷ୍ୟତ ପାଇଁ କାର୍ଯ୍ୟ କରିବା ନିମନ୍ତେ ବିଶ୍ୱର ସଂକଳ୍ପକୁ ନୂତନ ଉତ୍ସାହ ପ୍ରଦାନ କରିଛି ଏବଂ ଏଥିପାଇଁ ଏକ ରୋଡମ୍ୟାପ୍ ପ୍ରସ୍ତୁତ କରିଛି । ଜି-୨୦ ଢାଞ୍ଚା ଅଧୀନରେ ବୈଶ୍ୱିକ ଶିକ୍ଷା ଲକ୍ଷ୍ୟକୁ ଆଗକୁ ନେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ପ୍ରଦାନ କରାଯାଇଥିବା ଦୂରଦର୍ଶୀ ନେତୃତ୍ୱ ଏବଂ ସ୍ପଷ୍ଟ ଆଖ୍ୟାକୁ ପ୍ରଧାନ ପ୍ରଶଂସା କରିଥିଲେ । ସେ କହିଥିଲେ ଯେ ଏହା ଭାରତର ଶିକ୍ଷା ଓ ଦକ୍ଷତା ଇକୋସିଷ୍ଟମ ପାଇଁ ବିଶ୍ୱର ମାନ୍ୟତାକୁ ଦର୍ଶାଉଛି ଏବଂ ଆମର ଜାତୀୟ ଶିକ୍ଷା ନୀତି ୨୦୨୦ର ପ୍ରମୁଖ ନୀତି ଓ ପ୍ରାଥମିକତାକୁ ସମର୍ଥନ କରିଛି ।
