ମୋଦୀ ସରକାର ବ୍ୟାଙ୍କଗୁଡ଼ିକୁ 'କଲେକସନ ଏଜେଣ୍ଟ'ରେ କରିଛନ୍ତି ପରିଣତ... ଖଡ଼ଗେ
DAILY Odisha(ଜଗଦାନନ୍ଦ ପ୍ରଧାନ):–କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଶନିବାର ଦିନ ବ୍ୟାଙ୍କଗୁଡ଼ିକ ଦ୍ୱାରା ଲାଗୁ କରାଯାଉଥିବା ବିଭିନ୍ନ ପ୍ରକାରର ଶୁଳ୍କ ଉପରେ ପ୍ରଶ୍ନ ଉଠାଇ ଅଭିଯୋଗ କରିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ସରକାର ବ୍ୟାଙ୍କଗୁଡ଼ିକୁ “ସଂଗ୍ରହ ଏଜେଣ୍ଟ”ରେ ପରିଣତ କରି ଦେଇଛନ୍ତି। ଖଡ଼ଗେ ଖାତାରେ ନ୍ୟୂନତମ ବାଲାନ୍ସ ସହ ଜଡ଼ିତ ଶୁଳ୍କ, ଏଟିଏମ୍ରୁ ଟଙ୍କା ଉଠାଣ ସହ ଜଡ଼ିତ ଶୁଳ୍କ, ବ୍ୟାଙ୍କ ଷ୍ଟେଟମେଣ୍ଟ ସହ ଜଡ଼ିତ ଶୁଳ୍କ, ଋଣ ନେବା ପ୍ରକ୍ରିୟା ସହ ଜଡ଼ିତ ଶୁଳ୍କ ଏବଂ ଅନ୍ୟାନ୍ୟ କିଛି ଶୁଳ୍କର ଉଲ୍ଲେଖ କରିଛନ୍ତି।
କଂଗ୍ରେସ ମୁଖ୍ୟ ଏକ୍ସରେ ପୋଷ୍ଟ କରିଛନ୍ତି, “ଆମ ବ୍ୟାଙ୍କଗୁଡ଼ିକୁ ଦୁର୍ଭାଗ୍ୟବଶତଃ ମୋଦୀ ସରକାର ‘କଲେକସନ ଏଜେଣ୍ଟ’ କରି ଦେଇଛନ୍ତି। ସେ କହିଛନ୍ତି ଏବେ ଏଟିଏମ୍ରୁ ଟଙ୍କା ଉଠାଣ ଶୁଳ୍କ ମହଙ୍ଗା ହେବ। ମୋଦୀ ସରକାର ୨୦୧୮ ଓ ୨୦୨୪ ମଧ୍ୟରେ ସଞ୍ଚୟ ଖାତା ଏବଂ ଜନ ଧନ ଖାତାରୁ ନ୍ୟୂନତମ ଶେଷ ରାଶି ବଜାୟ ନ ରଖିବା କାରଣରୁ ଅତି କମରେ ୪୩,୫୦୦ କୋଟି ଟଙ୍କା ଉଠାଇ ନେଇଛନ୍ତି।”
ଖଡ଼ଗେ ପୁଣି ଅଭିଯୋଗ କରିଛନ୍ତି ଯେ ନାଗରିକମାନଙ୍କୁ ଲୁଟିବା ପାଇଁ ବ୍ୟାଙ୍କ ଦ୍ୱାରା ଲାଗୁ କରାଯାଉଥିବା ଶୁଳ୍କ- ନିଷ୍କ୍ରିୟତା ଶୁଳ୍କ, ଯାହା ପ୍ରତି ବର୍ଷ ୧୦୦-୨୦୦ ଟଙ୍କା ହୋଇଥାଏ। ଲୋକଙ୍କୁ ଲୁଟିବା ପାଇଁ ଏହା ଏକ ଯୋଜନା
ଜାଣନ୍ତୁ ମୋଦୀ ସରକାର ଲୋକଙ୍କୁ ଲୁଟିବା ପାଇଁ କିଭଳି କରିଛନ୍ତି ଯୋଜନା
ବ୍ୟାଙ୍କ ଷ୍ଟେଟମେଣ୍ଟ ଜାରି କରିବା ପାଇଁ ୫୦-୧୦୦ ଟଙ୍କା ଶୁଳ୍କ।
ଏସଏମଏସ୍ ଆଲର୍ଟ ପାଇଁ ପ୍ରତି ତ୍ରୈମାସିକ ୨୦-୨୫ ଟଙ୍କା ଶୁଳ୍କ ।
ବ୍ୟାଙ୍କ ଋଣ ପ୍ରକ୍ରିୟାକରଣ ଶୁଳ୍କ ଭାବେ ୧-୩% ଚାର୍ଜ କରେ।
ଯଦି ଋଣ ସମୟରେ ପରିଶୋଧ କରାଯାଏ, ତେବେ ଋଣ ପୂର୍ବ-ସମାପ୍ତି ଶୁଳ୍କ ଲାଗେ।
NEFT, ଡିମାଣ୍ଡ ଡ୍ରାଫ୍ଟ ଶୁଳ୍କ ଅତିରିକ୍ତ ଭାର।
ହସ୍ତାକ୍ଷର ପରିବର୍ତ୍ତନ ଭଳି KYC ଅପଡେଟ ଉପରେ ମଧ୍ୟ ଶୁଳ୍କ ।
କଂଗ୍ରେସ ଅଧ୍ୟକ୍ଷ କହିଛନ୍ତି ଯେ ପୂର୍ବରୁ ସରକାର ଏହି ଶୁଳ୍କରୁ ସଂଗ୍ରହ ହୋଇଥିବା ରାଶିର ତଥ୍ୟ ସଂସଦରେ ଉପଲବ୍ଧ କରାଉଥିଲେ, କିନ୍ତୁ ଏବେ ମୋଦୀ ସରକାରରେ ଏହି ପରମ୍ପରାକୁ ବନ୍ଦ କରି ଦିଆଯାଇଛି। ଖଡ଼ଗେ ଅଭିଯୋଗ କରିଛନ୍ତି ଯେ, “ଅତ୍ୟଧିକ ମୁଦ୍ରାସ୍ଫୀତି + ଅନିୟମିତ ଲୁଟ୍ = ବିଜେପିର ଜବରଦସ୍ତ ଉସୁଲି ମନ୍ତ୍ର।”
