ଅର୍ଥନୀତି ଖବର: ୧ ଏପ୍ରିଲ୍ରୁ ବଦଳିଯିବ ଆୟକର ନିୟମ
ନୂଆ ଆର୍ଥିକ ବର୍ଷ ଆରମ୍ଭ ହେବାକୁ ଆଊ ଅଳ୍ପ କିଛି ଘଣ୍ଟା ରହିଲା। ଆର୍ଥିକ ବର୍ଷ ଆରମ୍ଭରୁ ଆୟକର ସହ ଜଡ଼ିତ ଅନେକ ନିୟମରେ ପରିବର୍ତ୍ତନ ହେବାକୁ ଯାଉଛି।
ଅର୍ଥ ମନ୍ତ୍ରୀ ନିର୍ମଳା ସୀତାରମଣଙ୍କ ଦ୍ୱାରା ସାଧାରଣ ବଜେଟ୍ ୨୦୨୫ରେ ଅନେକ ଗୁରୁତ୍ୱପୂର୍ଣ୍ଣ ଘୋଷଣା କରାଯାଇଥିଲା, ଯାହା ୧ ଏପ୍ରିଲ୍ରୁ ଲାଗୁ ହେବ ବୋଲି କୁହାଯାଇଥିଲା,ଯାହାର ସିଧାସଳଖ ପ୍ରଭାବ ଦରମା ପାଉଥିବା ଲୋକଙ୍କ ଜେବ ଉପରେ ପଡ଼ିବ।
ଏହି ନୂଆ ନିୟମଗୁଡ଼ିକରେ ଆୟକରରେ ଅଧିକ ଛାଡ଼ ଠାରୁ ଆରମ୍ଭ କରି ଟିଡିଏସ୍ (TDS) ନିୟମରେ ହୋଇଥିବା ପରିବର୍ତ୍ତନ ସାମିଲ ରହିଛି।
ଅର୍ଥ ମନ୍ତ୍ରୀଙ୍କ ଦ୍ୱାରା ବଜେଟ୍ରେ ନୂଆ ଟ୍ୟାକ୍ସ ରିଜିମ୍ ଅଧୀନରେ ଆୟକରରେ ବଢ଼ାଯାଇଥିବା ଛାଡ଼ ୧ ଏପ୍ରିଲ୍ରୁ ଲାଗୁ ହେବ। ଏବେ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ବାର୍ଷିକ ଆୟ ଥିବା ଲୋକମାନେ ଆୟକର ଛାଡ଼ର ପରିସରକୁ ଆସିବେ। ପୂର୍ବରୁ ଏହି ସଂଖ୍ୟା ୭ ଲକ୍ଷ ଟଙ୍କା ଥିଲା।
ଏହା ସହିତ, ଯଦି ଦରମା ପାଉଥିବା ଲୋକଙ୍କୁ ମିଳୁଥିବା ୭୫,୦୦୦ ଟଙ୍କାର ଷ୍ଟାଣ୍ଡାର୍ଡ ଡିଡକ୍ସନ୍ ଛାଡ଼କୁ ମିଶାଇ ଦିଆଯାଏ, ତେବେ ଆୟକର ଛାଡ଼ ୧୨.୭୫ ଲକ୍ଷ ଟଙ୍କା ହୋଇଯିବ।
ତେବେ, ଆୟକର ଛାଡ଼ରେ କ୍ୟାପିଟାଲ୍ ଗେନ୍ସକୁ ସାମିଲ କରାଯାଇ ନାହିଁ। ଏହା ଉପରେ ଅଲଗା ଟ୍ୟାକ୍ସ ଲାଗିବ। ସରକାର ନୂଆ ଟ୍ୟାକ୍ସ ରିଜିମ୍ ଅଧୀନରେ ନୂଆ ଟ୍ୟାକ୍ସ ସ୍ଲାବ୍ ମଧ୍ୟ ଉପସ୍ଥାପନ କରିଛନ୍ତି, ତେବେ ପୁରୁଣା ଟ୍ୟାକ୍ସ ରିଜିମ୍ରେ କୌଣସି ପ୍ରକାରର ପରିବର୍ତ୍ତନ କରାଯାଇ ନାହିଁ।
ଏବେ ନୂଆ ଟ୍ୟାକ୍ସ ରିଜିମ୍ ଅଧୀନରେ ୪ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଟ୍ୟାକ୍ସ-ମୁକ୍ତ ହେବ, ଯେଊଁଥିରେ ୪ ଲକ୍ଷରୁ ୮ ଲକ୍ଷ ଟଙ୍କା ମଧ୍ୟରେ ଆୟ ଉପରେ ୫ ପ୍ରତିଶତ ଟ୍ୟାକ୍ସ ଲାଗିବ। ଆୟ ବଢ଼ିବା ସହିତ ଟ୍ୟାକ୍ସ ହାର ଧୀରେ ଧୀରେ ବଢ଼ିବ ଏବଂ ୨୪ ଲକ୍ଷ ଟଙ୍କାରୁ ଅଧିକ ଆୟ ଉପରେ ଏହା ୩୦ ପ୍ରତିଶତ ପର୍ଯ୍ୟନ୍ତ ପହଂଚିବ ।
କେନ୍ଦ୍ର ସରକାର ବଜେଟ୍ରେ ସେକ୍ସନ୍ ୮୭ଏ ଅଧୀନରେ ମିଳୁଥିବା ଟ୍ୟାକ୍ସ ଛାଡ଼କୁ ୨୫,୦୦୦ ଟଙ୍କାରୁ ବଢ଼ାଇ ୬୦,୦୦୦ ଟଙ୍କା କରିଛନ୍ତି, ଯାହାଦ୍ୱାରା ନୂଆ ଟ୍ୟାକ୍ସ ରିଜିମ୍ରେ ୧୨ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଟ୍ୟାକ୍ସ-ମୁକ୍ତ ହୋଇଯିବ।
ବ୍ୟାଙ୍କ ଜମା ଉପରେ ମିଳୁଥିବା ସୁଧ ଉପରେ ଟିଡିଏସ୍ କଟୌତି ସୀମାକୁ ୪୦,୦୦୦ ଟଙ୍କାରୁ ବଢ଼ାଇ ୫୦,୦୦୦ ଟଙ୍କା କରାଯାଇଛି। ଅର୍ଥାତ୍ ଏବେ ବ୍ୟାଙ୍କ ଜମା ଉପରେ ମିଳିଥିବା ୫୦,୦୦୦ ଟଙ୍କା ପର୍ଯ୍ୟନ୍ତ ରାଶି ଉପରେ କୌଣସି ଟିଡିଏସ୍ କଟାଯିବ ନାହିଁ।
୧ ଏପ୍ରିଲ୍ରୁ ନିଯୁକ୍ତିଦାତାଙ୍କ ଦ୍ୱାରା ଦିଆଯାଉଥିବା ଲାଭ ଏବଂ ଭତ୍ତା ଏବେ କରଯୋଗ୍ୟ ସୁବିଧା ଭାବେ ଶ୍ରେଣୀବଦ୍ଧ ହେବ ନାହିଁ।
ଏହା ସହିତ, ଯଦି କୌଣସି ନିଯୁକ୍ତିଦାତା ଜଣେ କର୍ମଚାରୀ କିମ୍ବା ତାଙ୍କ ପରିବାର ପାଇଁ ବିଦେଶରେ ଚିକିତ୍ସା ଖର୍ଚ୍ଚ ବହନ କରନ୍ତି, ତେବେ ଏହି ଖର୍ଚ୍ଚକୁ କରଯୋଗ୍ୟ ଲାଭ ବୋଲି ଗଣାଯିବ ନାହିଁ।
ଟ୍ୟାକ୍ସଦାତାଙ୍କୁ ଏବେ ଅପଡେଟେଡ୍ ଆୟକର ରିଟର୍ଣ୍ଣ (ଆଇଟିଆର୍-ୟୁ) ଦାଖଲ କରିବା ପାଇଁ ଦୁଇ ବର୍ଷ ବଦଳରେ ଚାରି ବର୍ଷ ସମୟ ମିଳିବ। ଏହି ସମୟ ବୃଦ୍ଧି ବ୍ୟକ୍ତିମାନଙ୍କୁ ସେମାନଙ୍କ ଟ୍ୟାକ୍ସ ଫାଇଲିଂରେ ତ୍ରୁଟି କିମ୍ବା ଭୁଲ୍କୁ ଦୀର୍ଘ ସମୟ ପର୍ଯ୍ୟନ୍ତ ସଂଶୋଧନ କରିବାକୁ ପଡିବ।
ସେ ପଟେ ପିତାମାତାଙ୍କ ପାଇଁ ଏକ ନୂଆ ଟ୍ୟାକ୍ସ-ସଞ୍ଚୟ ବିକଳ୍ପ ଉପସ୍ଥାପନ କରାଯାଇଛି, ଯେଉଁମାନେ ସେମାନଙ୍କ ସନ୍ତାନର ଏନପିଏସ୍ ବାତ୍ସଲ୍ୟ ଖାତା ଯୋଜନାରେ ସାମିଲ ହେବ, ସେମାନେ ପୁରୁଣା ଟ୍ୟାକ୍ସ ବ୍ୟବସ୍ଥା ଅଧୀନରେ ୫୦,୦୦୦ ଟଙ୍କାର ଅତିରିକ୍ତ କଟୌତି ଦାବି କରିପାରିବେ।
