୬୦ ହଜାର ନିଖୋଜ ମହିଳାଙ୍କୁ ଖୋଜିଲା କଂଗ୍ରେସ

ଭୁବନେଶ୍ୱର -ପ୍ରଦେଶ କଂଗ୍ରେସ ସଭାପତି ଭକ୍ତ ଚରଣ ଦାସଙ୍କ ନିର୍ଦ୍ଦେଶକ୍ରମେ ଭୁବନେଶ୍ୱର ଜିଲ୍ଲା କଂଗ୍ରେସ ସଭାପତି ବିଶ୍ୱଜିତ୍ ଦାସଙ୍କ ନେତୃତ୍ୱରେ ଭୁବନେଶ୍ୱର ଜିଲ୍ଲା କଂଗ୍ରେସ ପକ୍ଷରୁ ଅଭିନବ ଉପାୟରେ ଓଡ଼ିଶା ଦିବସ ପାଳନ କରାଯାଇଛି। ଓଡ଼ିଶାର ୬୦ ହଜାର ନିଖୋଜ ମହିଳାଙ୍କ ପାଇଁ ଏକ ଶୋଭାଯାତ୍ରା ବାହାରି ମାଷ୍ଟରକ୍ୟାଂଟିନ୍ ଠାରେ ଥିବା ବସଷ୍ଟାଣ୍ଡ ଏବଂ ଭୁବନେଶ୍ୱର ରେଲୱେ ଷ୍ଟେସନ ପର୍ଯ୍ୟନ୍ତ ଯାଇଥିଲା। ସେଠାରେ ନିଖୋଜ ମହିଳାମାନଙ୍କୁ କଂଗ୍ରେସ ନେତୃବର୍ଗ, ମହିଳା କଂଗ୍ରେସ ନେତୃବର୍ଗ ଓ କର୍ମୀମାନେ ଖୋଜିଥିଲେ। ଏହିଭଳି କାର୍ଯ୍ୟକ୍ରମ ଆଜି ସାରା ଓଡ଼ିଶାରେ ବିଭିନ୍ନ ଜିଲ୍ଲାରେ ଜିଲ୍ଲା କଂଗ୍ରେସ ପକ୍ଷରୁ ଆୟୋଜିତ କରାଯାଇଛି। ମାଷ୍ଟରକ୍ୟାଣ୍ଟିନସ୍ଥିତ ବସଷ୍ଟାଣ୍ଡ ଓ ରେଲୱେ ଷ୍ଟେସନରେ ମହିଳା ନିର୍ଯ୍ୟାତନା, ଦୁଷ୍କର୍ମ, ହତ୍ୟା ଓ ନିଖୋଜ ପ୍ରସଙ୍ଗରେ ସ୍ଲୋଗାନ ଦିଆଯାଇଥିଲା। ଏହି ପ୍ରସଙ୍ଗରେ ପିସିସି ସଭାପତି ଶ୍ରୀ ଦାସ କହିଥିଲେ ଯେ ୯ ମାସର ବିଜେପି ସରକାର ମହିଳାମାନଙ୍କ ସମସ୍ୟା ପ୍ରତି ଉଦାସୀନ ରହିଛି। ମହିଳାମାନେ ନ୍ୟାୟ ପାଉନାହାନ୍ତି। ମହିଳାମାନଙ୍କୁ ନ୍ୟାୟ ଦେବା ପାଇଁ କଂଗ୍ରେସ ଦାବି କରିବାରୁ ଓଡ଼ିଶାର ବିଜେପି ସରକାର କଂଗ୍ରେସ ନେତୃବର୍ଗ ଓ କର୍ମୀମାନଙ୍କ ଉପରେ ଶାରିରୀକ ଆକ୍ରମଣ କରୁଛି। ଯେ ପର୍ଯ୍ୟନ୍ତ ଓଡ଼ିଶାର ନିର୍ଯ୍ୟାତିତା ଓ ଦୁଷ୍କର୍ମ ପିଡ଼ିତା ମହିଳା ନ୍ୟାୟ ନ ପାଇଛନ୍ତି ସେ ପର୍ଯ୍ୟନ୍ତ ଆନ୍ଦୋଳନାତ୍ମକ କାର୍ଯ୍ୟକ୍ରମ ଜାରି ରହିବ ଏବଂ ସଂଗ୍ରାମ ଜାରି ରହିବ। ଯଦି ମୋହନ ସରକାର ସମସ୍ୟାର ସମାଧାନ ନ କରି ଦମନମୂଳକ ଉପାୟ ଜାରି ରଖନ୍ତି ତେବେ କଂଗ୍ରେସ ତା’ର ସଂଗ୍ରାମକୁ ଏତେ ତୀବ୍ରତର କରିବ ଯେ ମୋହନ ସରକାର ଥରହର ହୋଇଯିବ। ଏହାପରେ ମହିଳା କଂଗ୍ରେସ କର୍ମୀମାନେ ପ୍ରତି ଗ୍ରାମ, ପୁରପଲ୍ଲୀ ଓ ପଡ଼ାରେ ମହମବତି ଶୋଭାଯାତ୍ରା କରି ମୋହନ ସରକାର ବିରୁଦ୍ଧରେ ନିଜର ଅସନ୍ତୋଷ ବ୍ୟକ୍ତ କରିବେ।