ଭୁବନେଶ୍ୱର : ମହାକାଶ ଇତିହାସରେ ଚନ୍ଦ୍ରଯାନ-୩ ଏବଂ ଆଦିତ୍ୟ-ଏଲ୍ ୧ ର ସଫଳ ଅଭିଯାନ ଭାରତ ପାଇଁ ଅକଳ୍ପନୀୟ ଗୌରବ ଆଣିଥିବାବେଳେ ଏହି ମିଶନରେ ସାମିଲ ଥିବା ଓଡିଶାର ବିଜୁ ପଟ୍ଟନାୟକ ଫିଲ୍ମ ଏଣ୍ଡ ଟେଲିଭିଜନ ଇନଷ୍ଟିଚ୍ୟୁଟର ଛାତ୍ର ଦୀପକ କୁମାର ସାହୁ, ଶିବୁ ପୃଷ୍ଟି ଏବଂ ନିରଞ୍ଜନ ମହାରଣା ଉଭୟ ମିଶନର ଫଟୋଗ୍ରାଫି ଓ ଭିଡିଓଗ୍ରାଫି ସହାୟତା ପ୍ରଦାନ କରି ଓଡିଶା ପାଇଁ ଗୌରବ ଆଣିଛନ୍ତି । ଏହି ଫଟୋଗୁଡ଼ିକ ବିଶ୍ୱର ଅଗ୍ରଣୀ ମିଡିଆ ହାଉସରେ ପ୍ରକାଶିତ ହୋଇଥିଲା ଏବଂ ଏହାକୁ ପ୍ରଧାନମନ୍ତ୍ରୀ ଏବଂ ଅନ୍ୟ ମନ୍ତ୍ରୀମାନେ ଟ୍ୱିଟ୍ କରିବା ପାଇଁ ବ୍ୟବହାର କରିଥିଲେ । ଏ ସମସ୍ତ କାର୍ଯ୍ୟରେ ସହାୟତା ପ୍ରଦାନ ପାଇଁ ଇସ୍ରୋ ସହିତ ଚୁକ୍ତିନାମାରେ ଯୋଗ ଦେଇଥିବା ଏହି ଅନୁଷ୍ଠାନର ବିଷ୍ଣୁତ୍ରାଣ ପୃଥିପଦ, ଯଶୋବନ୍ତ ଆଚାର୍ଯ୍ୟ ଏବଂ ଅଚ୍ୟୂତାନନ୍ଦ ନାହାକ ଏହି ମିଶନରେ ଅତ୍ୟନ୍ତ ବୃତିଗତ ଭାବରେ କାର୍ଯ୍ୟ କରି ବେଶ ପ୍ରଶଂସିତ ହୋଇଛନ୍ତି ।
ବର୍ତମାନ ଇସ୍ରୋର ବରିଷ୍ଠ ବୈଷୟିକ ସହାୟକ ଭାବ କାର୍ଯ୍ୟରତ ଏହି କୃତୀ ଛାତ୍ରମାନେ ଆଜି ପର୍ଯ୍ୟନ୍ତ ଅନେକ ରକେଟ୍ ମିଶନ୍ ପାଇଁ କାର୍ଯ୍ୟ କରିଛନ୍ତି । ସମ୍ପ୍ରତି ଚନ୍ଦ୍ରଯାନ-୩ ଏବଂ ଆଦିତ୍ୟ-ଏଲ୧ ମିଶନ୍ ପାଇଁ ସେମାନେ ସମସ୍ତ ଫଟୋଗ୍ରାଫିକ୍ ସହାୟତା ପ୍ରଦାନ କରିଛିନ୍ତି । ରକେଟ୍ ପର୍ଯ୍ୟାୟ ଏବଂ ଏକୀକରଣ କାର୍ଯ୍ୟକଳାପର ସମସ୍ତ ଭିଡିଓଗ୍ରାଫି କରିବା ସହିତ ବିଭିନ୍ନ ଷ୍ଟାଟିକ୍ ଟେଷ୍ଟ, ମୋଟର ଫାୟାରିଂ, ଚନ୍ଦ୍ରଯାନ -୩ ସାଟେଲାଇଟ୍ ଡ୍ରପ୍ ଟେଷ୍ଟ ଇତ୍ୟାଦିର ବୈଜ୍ଞାନିକ ବିଶ୍ଳେଷଣ ପାଇଁ ହାଇ ସ୍ପିଡ୍ ଫଟୋଗ୍ରାଫି, ମାନୁଆଲ୍ ଭିଡିଓ ଟ୍ରାକିଂ, ଫିକ୍ସଡ୍ କ୍ୟାମେରା ନେଟୱାର୍କ, ରିଲେ ପାୱାରରେ ଫାଇବର ଅପଫିକ୍ ନେଟୱାର୍କ ଆଦିରେ ଫଟୋ ଓ ଭିଡିଓଗ୍ରାଫି ସମ୍ପାଦନ କରିବା ସହିତ ଇସ୍ରୋ ମୁଖ୍ୟାଳୟ, ଦୂରଦର୍ଶନ ଏବଂ ସମସ୍ତ ମିଡିଆ ଚ୍ୟାନେଲମାନଙ୍କୁ ସହାୟକ ତଥ୍ୟ ଯୋଗାଇ ଦେଇଥିଲେ । ଦେଶର ସମସ୍ତ ବୈଜ୍ଞାନିକ ଏବଂ ମନ୍ତ୍ରୀମାନଙ୍କ ସହିତ ମିଶନ୍ କେଂଟ୍ରାଲ୍ ସେଂଟରରେ ଦିନିକିଆ ଭିଡିଓ କଭରେଜ୍ କରିବା ସହ ମାନ୍ୟଗଣ୍ୟ ବ୍ୟକ୍ତିଙ୍କ ସହିତ ପ୍ରଧାନମନ୍ତ୍ରୀଙ୍କ ଗସ୍ତକୁ ମଧ୍ୟ ଆଚ୍ଛାଦନ କରିଥିଲେ ।
