ବଲାଙ୍ଗିର : ସମଗ୍ର ଭାରତରେ ଲୋକପ୍ରିୟ ଜାତୀୟ ସ୍ତରରେ କଣ୍ଠ ସଙ୍ଗୀତ ପ୍ରତିଯୋଗୀତା ଇଣ୍ଡିଆନ ଆଇଡଲ ସିଜନ ୧୪ ର ଅଡିସନ୍ ରାଉଣ୍ଡରେ ବଲାଙ୍ଗିରର ଉଦୀୟମାନ କଣ୍ଠଶିଳ୍ପୀ ସଂଗୀତଜ୍ଞ ଅଜୟ ଅମର ସିଂହ ଦେଓଙ୍କୁ ଗୋଲଡେନ୍ ଟିକେଟ ମିଳିଛି। ସୋନି ଟିଭି ପ୍ରାୟୋଜିତ ଏହି ଅଡିସନ୍ ରାଉଣ୍ଡରେ ଯୋଗ୍ୟ ବିବେଚିତ ଅଜୟଙ୍କ ଗତ ଶନିବାର କାର୍ଯ୍ୟକ୍ରମ ପ୍ରସାରିତ ହେବା ପରେ ତାଙ୍କ ଉପରେ ପ୍ରଶଂସାର ବର୍ଷା ହୋଇଛି। କାର୍ଯ୍ୟକ୍ରମରେ ଭାଗ ନେବାକୁ ସେପ୍ଟେମ୍ବରରେ ସେ ମୁମ୍ବାଇ ଯାଇଥିଲେ। ଦେଶର ବିଭିନ୍ନ କୋଣ ଅନୁକୋଣରୁ ହଜାର ହଜାର କଣ୍ଠଶିଳ୍ପୀ ତାଙ୍କର ପ୍ରତିଭା ଦେଖାଇବାକୁ କାର୍ଯ୍ୟକ୍ରମରେ ଭାଗ ନେଇଥିଲେ। ବିଚାରକ ମଣ୍ଡଳୀରେ କୁମାର ସାନୁ, ଶ୍ରେୟା ଘୋଷାଲ, ବିଶାଲ ଦାଦଲାନି ପ୍ରମୁଖ ମନ୍ତ୍ରମୁଗ୍ଧ ହୋଇ ଅଜୟଙ୍କ ଗୀତ ଓ ଭାଓଲିନ ଶୁଣିବା ପରେ ବହୁତ ପ୍ରଶଂସା କରିଥିଲେ। ଚର୍ଚିତ ହିନ୍ଦୀ ସିନେମା ଅଗ୍ନିପଥରେ ଗାଇଥିବା ସୋନୁ ନିଗମଙ୍କ ” ଅଭି ମୁଝମେ କହିଁ …… ଗୀତକୁ ସେ ଅତି ନିଖୁଣ ଭାବରେ ଗାଇଥିବା ବେଳେ ତାଙ୍କର ଭାଓଲିନ ବଜାଇବା ଶୈଳୀକୁ ବିଚାରକ କୁମାର ସାନୁ ପ୍ରଶଂସା କରିଥିଲେ। ବିଚାରକ ମାନେ ଅଜୟଙ୍କ ବାପା ଗୁରୁ ଦିଲୀପ ସିଂହଦେଓଙ୍କୁ ମଞ୍ଚକୁ ଡାକି ଅଭିନନ୍ଦନ ଜଣାଇଥିଲେ। ଅଜୟଙ୍କ କଳା ନିପୁଣତା ବଢାଇବା ପାଇଁ ସଙ୍ଗୀତ ସାଧନା ଓ ପ୍ରତିଭାର ଭୂରି ଭୂରି ପ୍ରଶଂସା କରି ପୁଅ ପାଇଁ ତାଙ୍କୁ ଗୋଲଡେନ୍ ଟିକେଟ ପ୍ରଦାନ କରିଥିଲେ। ସାଥିରେ ଅଡିସନ୍ ପାଇଁ ଯାଇଥିବା ଅଜୟଙ୍କ ମା ନଳିନୀ ସିଂ ମଧ୍ୟ ଖୁସି ବ୍ୟକ୍ତ କରିଥିଲେ।
ଅଜୟଙ୍କ ପିତା ବଲାଙ୍ଗିରର ଜଣେ ଜଣାଶୁଣା ସଙ୍ଗୀତଜ୍ଞ। କଳାର ନିପୁଣତା ତାଙ୍କ ଭିତରେ ଭରି ରହିଛି। ଏଠାରେ କଳାଧାମ ଆର୍ଟ୍ ଇନଷ୍ଟିଚ୍ୟୁଟ ନାମରେ ସଂସ୍ଥାରେ ଛୋଟ ଛୋଟ ପିଲାଙ୍କ ଭିତରେ ଥିବା ସଙ୍ଗୀତ, ଚିତ୍ରକଳା, ନୃତ୍ୟ ନିପୁଣତା ବଢାଇବା ଦିଗରେ କାମ କରୁଛି। ଏହି ଇନଷ୍ଟିଚ୍ୟୁଟକୁ ଆସୁଥିବା ପିଲା ମାନଙ୍କୁ ଦେଖି ଅଜୟ ଛୋଟ ଦିନରୁ ବାପାଙ୍କ ଠାରୁ ସଙ୍ଗୀତ ଶିକ୍ଷା ଲାଭ କରିଥିଲେ। ସେ ଗାୟନ ସହିତ ଭାଓଲିନ, ଗୀଟାର, ହାରମୋନିୟମ, ତବଲା, କୀବୋର୍ଡ ନିପୁଣତା ହାସଲ କରିଛନ୍ତି। ବାପା ଶିକ୍ଷକତା କରୁଥିବା କଦମ୍ ପଡା ସରସ୍ଵତୀ ଶିଶୁ ବିଦ୍ୟାମନ୍ଦିରରୁ ମେଟ୍ରିକ ଶିକ୍ଷା ପରେ ରାଜେନ୍ଦ୍ର କଲେଜରେ ପଢି ଏବେ ବନାରସ୍ ବିଶ୍ଵବିଦ୍ୟାଳୟ ଆର୍ଟ ସ୍ନାତକତ୍ତୋର ଶେଷ ବର୍ଷ ଛାତ୍ର ରୂପେ ଅଧ୍ୟୟନରତ। ଭାରତ ସରକାର ସଂସ୍କୃତି ମନ୍ତ୍ରଣାଳୟ ର ସେଣ୍ଟର ଫର କଲଚର୍ ରିସର୍ଚ ଆଣ୍ଡ ଟ୍ରେନିଂ ପକ୍ଷରୁ ସଙ୍ଗୀତ ଗବେଷଣା ପାଇଁ ତାଙ୍କୁ ଫେଲୋସିପ ପ୍ରଦାନ କରାଯାଇଛି। ପୂର୍ବରୁ ଅଜୟ ଓଡିଶା ଜି ସାର୍ଥକ ସାରେଗାମାରେ ବିଜେତା ରହିଛନ୍ତି।
