ରାଉରକେଲା : ସୁନ୍ଦରଗଡ଼ ଜିଲ୍ଲା ବଣେଇ ଉପଖଣ୍ଡ ଅନ୍ତର୍ଗତ ଲହୁଣୀପଡ଼ା ଅଂଚଳରେ ଗତ କିଛି ଦିନ ହେଲା ହାତୀ ଉପଦ୍ରବ ଦେଖିବାକୁ ମିଳିଛି । ସଞ୍ଜ ନଇଁଲେ ଜଙ୍ଗଲି ହାତୀ ପଲ ଖାଦ୍ୟ ଅନ୍ବେଷଣରେ ଗ୍ରାମ ଓ ବିଭିନ୍ନ ଜନବସତିକୁ ପଶି ଆସୁଛନ୍ତି । ଲୋକଙ୍କ ଘରଦ୍ଵାର ଭାଙ୍ଗିବା ସହ ଖାଇ ଓ ଦଳିଚକଟି ବ୍ୟାପକ ଫସଲ ନଷ୍ଟ କରୁଛନ୍ତି । ତେବେ ଜଙ୍ଗଲ ବିଭାଗ ପକ୍ଷରୁ ଏ ଦିଗରେ ଏଯାବତ୍ କୌଣସି ସନ୍ତୋଷଜନକ ପଦକ୍ଷେପ ନିଆଯାଇନଥିବାରୁ ଗ୍ରାମବାସୀ ମାନେ ମିଳିତ ଭାବେ ଗାଁ କୁ ଆସିଥିବା ବନ କର୍ମଚାରୀଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି । ସମ୍ପୃକ୍ତ ବନ କର୍ମଚାରୀ ଏ ସଂକ୍ରାନ୍ତରେ ଲହୁଣୀପଡ଼ା ଥାନାରେ ଏତଲା କରିଥିବା ଜଣାପଡିଛି । ଏତଲାକୁ ଭିତି କରି ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
