କୋରେଇ : ପାଣିକୋଇଲି ଥାନା ଅନ୍ତର୍ଗତ ଅମୃତିଆ ପଞ୍ଚାୟତର ବଣହରା ଗ୍ରାମରେ ଗତ ବୁଧବାର ରାତିରେ ସାମାନ୍ୟ ବଚସାକୁ କେନ୍ଦ୍ର କରି ଅନ୍ୟ ଜଣେ ଯୁବକଙ୍କ ବେକକୁ ଖଣ୍ଡାରେ ଆକ୍ରମଣ କରିବା ଘଟଣାରେ ଅଭିଯୁକ୍ତ ବଣହରା ଗ୍ରାମର ମଣିଭଦ୍ର ସାହୁକୁ ପୁଲିସ ଗିରଫ କରି ଅଦାଲତ ଚାଲାଣ କରିଛି । ପ୍ରକାଶ ଯେ ଅମୃତିଆ ଗ୍ରାମର ଶରତ ମାଝୀଙ୍କ ପୁଅ ସାଇଶ୍ୱର ମାଝୀ ଓ ତାଙ୍କ ସାଙ୍ଗ ଅଭିଯୁକ୍ତ ବଣହରା ଗ୍ରାମର ମଣିଭଦ୍ର ସାହୁ ବୁଧବାର ରାତି ୯ଟାବେଳେ ଅନ୍ୟ ସାଙ୍ଗମାନଙ୍କ ସହିତ ସ୍ଥାନୀୟ ଏକ ହେଟେଲରେ ରାତ୍ରୀଭୋଜନ କରୁଥିବାବେଳେ ମଣିଭଦ୍ର ନିଜର ସାର୍ଟ ଭିତରେ ଲୁଚାଇ ରଖିଥିବା ଏକ ଖଣ୍ଡାକୁ ସାଇଶ୍ୱର ଦେଖିବା ପରେ ପାଟିକରି କିଛି କହିଥିଲା । ପରେ ଏହାକୁ ନେଇ ନିଶାସକ୍ତ ଥିବା ମଣ୍ିଭଦ୍ର ସାଇଶ୍ୱରକୁ ଜାତିଆଣ ମନ୍ତବ୍ୟ ଦେଇ ଗାଳି କରିଥିଲା । ଉକ୍ତ ଘଟଣା ଗଣ୍ଡଗୋଳରୁ ହାତାହାତି ପର୍ଯ୍ୟନ୍ତ ଯାଇଥିଲା । ତେବେ ଏଥିରେ ଉତ୍ୟକ୍ତ ହୋଇ ମଣିଭଦ୍ର ଧରିଥିବା ଖଣ୍ଡାରେ ସାଇଶ୍ୱରକୁ ଆକ୍ରମଣ କରିଥିଲା । କିନ୍ତୁ ଉପସ୍ଥିତ ଥିବା ଅନ୍ୟ ସାଙ୍ଗମାନଙ୍କ ସହିତ ହୋଟେଲର କର୍ମଚାରୀମାନେ ବିରୋଧ କରିବାକୁ ଏକ ବଡ଼ ଧରଣର ଅଘଟଣକୁ ଏଡ଼ାଇ ଦିଆଯାଇ ପାରିଥିଲା । ଆକ୍ରମଣ କରିବା ପରେ ମଣିଭଦ୍ର ଘଟଣାସ୍ଥଳରୁ ଫେରାର ହୋଇଯାଇଥିଲା । ପରେ ଉକ୍ତ ଘଟଣା ବିଷୟରେ ଖବର ପାଇ ପାଣିକୋଇଲି ଥାନା ପୁଲିସ ଉକ୍ତ ଗ୍ରାମ ଉପରେ ରାତି ଅଧିଆ ଚଢ଼ାଉ କରି ଆକ୍ରମଣ କରିଥିବା ଯୁବକଙ୍କୁ ଗିରଫ କରିଥିଲା । ଏ ନେଇ ଉପସ୍ଥିତ ଅନ୍ୟ ସାଙ୍ଗମାନେ ସାଇଶ୍ୱରକୁ ସ୍ଥାନୀୟ ଏକ ଡ଼ାକ୍ତରଖାନାରେ ପ୍ରାଥମିକ ଚିକିତ୍ସା କରାଇବା ପରେ ତାଙ୍କର ଅଭିଯୋଗ କ୍ରମେ ଥାନାରେ ଏକ ମାମଲା ୨୭୮/୨୩ ଦଫା ୩୦୭,୨୯୪ ଓ ଏସ ସିଏସଟି ଆକ୍ଟ ଅନୁସାରେ ମାମଲା ଋଜୁ କରିବା ସହିତ ତଦନ୍ତକାରୀ ଅଧିକାରୀ ଯାଜପୁର ରୋଡ଼ ଏସଡ଼ିପିଓ ସଂଜୟ ପଟ୍ଟନାୟକ, ଥାନାର ସବଇନିସପେକ୍ଟର ପ୍ରକାଶ କୁମାର ପ୍ରଧାନ ପ୍ରମୁଖ ସାଇଣ୍ଟିଫିକ ଟିମ ମାଧ୍ୟମରେ ତଦନ୍ତ କରିବା ସହ ଘଟଣାସ୍ଥଳକୁ ଅଭିଯୁକ୍ତକୁ ନେଇ କ୍ରାମଇ ସିନ କରିବା ପରେ ପରେ ଅଭିଯୁକ୍ତ ମଣିଭଦ୍ରକୁ ଘଟଣାସ୍ଥଳକୁ ନେଇ ଲୁଚାଇ ରଖିଥିବା ଖଣ୍ଡାକୁ ଜବତ କରିଥିଲେ । ପରେ ଆଜି ତାକୁ ଅଦାଲତ ଚାଲାଣ କରାଯାଇଛି ।
