ନୂଆଦିଲ୍ଲୀ, 6 ଜୁନ – ଦିନ କ ପୂର୍ବରୁ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ଭଦ୍ରା ରାହୁଲ ଗାନ୍ଧିଙ୍କୁ ନେଇ ଏକ ଭାବବିହ୍ୱଳ ପୋଷ୍ଟ ସୋସିଆଲ ମିଡିଆରେ ପୋଷ୍ଟ କରିଥିଲେ । ନିର୍ବାଚନ ପରେ ବୁଧବାର ଏହା ତାଙ୍କର ପ୍ରଥମ ପୋଷ୍ଟ ଥିଲା । ଏଭଳି ଏକ ଅନ୍ୟ ଭାବବିହ୍ୱଳ ପୋଷ୍ଟ ଗୁରୁବାର ପ୍ରିୟଙ୍କା ଗାନ୍ଧି ଭଦ୍ରା ସୋସିଆଲ ମିଡିଆ ଏକ୍ସରେ ଉତ୍ତର ପ୍ରଦେଶ କଂଗ୍ରେସ କାର୍ଯ୍ୟକର୍ତ୍ତାଙ୍କ ପାଇଁ ଲେଖିଛନ୍ତି, ଯେଉଁଥିରେ ସେ ନିର୍ବାଚନ ଲୋକଙ୍କର ଅଟେ, ଲୋକେ ହିଁ ଲଢନ୍ତି ଏବଂ ଲୋକେ ହିଁ ଜିତନ୍ତି ବୋଲି କହିଛନ୍ତି ।
କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧି ଭଦ୍ରା ସୋସିଆଲ ମିଡିଆ ଏକ୍ସରେ ପୋଷ୍ଟ ଲେଖି ଉତ୍ତର ପ୍ରଦେଶର କଂଗ୍ରେସ କାର୍ଯ୍ୟକର୍ତ୍ତାଙ୍କୁ ଧନ୍ୟବାଦ ଜଣାଇଛନ୍ତି । ସେ କାର୍ଯ୍ୟକର୍ତ୍ତାଙ୍କୁ ସଲାମ କରିଛନ୍ତି । ସୋସିଆଲ ମିଡିଆ ଆକାଉଂଟରେ ସେ ଲେଖିଛନ୍ତି ଯେ, ୟୁପି କଂଗ୍ରେସର ମୋର ସମସ୍ତ ସାଥିଙ୍କୁ ମୋର ସଲାମ । ମୁଁ ଆପଣଙ୍କୁ ଖରା ଓ ଧୂଳିରେ କଠୋର ପରିଶ୍ରମ କରିଥିବାର ଦେଖିଛି, ଆପଣ ନଇଁନାହାନ୍ତି, ଆପଣ ରହିନାହାନ୍ତି, କଠିନରୁ କଠିନ ସମୟରେ ଆପଣ ଲଢିବାର ସାହସ ଦେଖାଇଛନ୍ତି । ଆପଣଙ୍କୁ ପ୍ରତାଡିତ କରାଯାଇଛି, ଆପଣଙ୍କ ଉପରେ ମିଛ ମକଦ୍ଦମା କରାଯାଇଛି, ଜେଲ ପଠାଯାଇଛି, ବାରମ୍ବାର ନଜରବନ୍ଦ କରାଯାଇଛି କିନ୍ତୁ ଆପଣ ଡରିନାହାନ୍ତି । କିଛି ନେତା ଡରିକି ଚାଲିଯାଇଛନ୍ତି, ଆପଣ ତିଷ୍ଠି ରହିଛନ୍ତି ।
