ରାଉରକେଲା, ୧୨ ଅକ୍ଟୋବର – ରାଉରକେଲା ପୁଲିସ ଜିଲ୍ଲା ଅର୍ନ୍ତଗତ ବ୍ରାହ୍ମଣୀତରଙ୍ଗ ଥାନା ଅଂଚଳର ତୁମରନ ଗାଁ ରେ ଜଣେ ବାପା ତାର ୧୪ ମାସର ପୁଅକୁ ଟାଙ୍ଗିଆରେ ହାଣି ହତ୍ୟା କରିଥିବା ଖବର ମିଳିଛି । ଆଜି ପୁଲିସର ଏକ ଟିମ ଘଟଣାସ୍ଥଳରେ ପହଁଚି ଅଭିଯୁକ୍ତ ବାପ ବି. ସିଂକୁ ଗିରଫ କରିବା ସହ ନାବାଳକର ଶବକୁ ଜବତ କରି ପୋଷ୍ଟମର୍ଟମ ନିମନ୍ତେ ପଠାଇଛି । ତେବେ ଘରେ ପାରିବାରିକ କଳହ ଲାଗି ଅଭିଯୁକ୍ତ ପ୍ରଥମେ ତାର ପତ୍ନୀକୁ ଟାଙ୍ଗିଆରେ ହାଣିବା ଲାଗି ଗୋଡାଇ ହାଣିବାକୁ ଉଦ୍ୟମ କରୁଥିବା ବେଳେ ପୁଅ ଉପରେ ଚୋଟ ବସିଥିଲା ଓ ଘଟଣାସ୍ଥଳରେ ସେ ଟଳିପଡିଥିଲା । ଏହି ଘଟଣା ଭିତରେ ଗାଁର କିଛି ଲୋକ ମଧ୍ୟ ଆହତ ହୋଇଥିବା ଖବର ମିଳିଛି । ରାତିସାରା ଗାଁରେ ଏହି ତାଣ୍ଡବଲିଳା ଚାଲିଥିବା ବେଳେ ସକାଳେ ପୁଲିସି ଥାନା ଠାରୁ ୫ କି.ମି. ଦୂରରେ ଥିବା ଏହି ଗାଁରେ ପହଁଚିଥିଲା । ଅଭିଯୁକ୍ତକୁ ଧରିରଖିଥିବା ଗାଁ ଲୋକଙ୍କ ଠାରୁ ପୁଲିସ ଅଭିଯୁକ୍ତକୁ ହେପାଜତକୁ ନେବାସହ ଡାକ୍ତରଖାନାରେ ରଖି ପଚରା ଉଚରା ଜାରୀ ରଖିଛି ।
