କନ୍ଧମାଳ : ଜନସେବାକୁ ପାଥେୟ କରି ବିଗତ ଚାରି ବର୍ଷ ଧରି ଫୁଲବାଣୀ ତଥା କନ୍ଧମାଳ ଜିଲ୍ଲାର ବିଭିନ୍ନ ଅଂଚଳରେ ନିଜର ନିରବଚ୍ଛିନ୍ନ ସେବା ଜାରି ରଖିଛି ସ୍ୱେଛାସେବୀ ସଂଗଠନ ଟିମ୍ ହ୍ୟୁମାନିଟି କନ୍ଧମାଳ । ଆବାହକ ଭି. ଲୋକନାଥ ରାଜୁଙ୍କ ନେତୃତ୍ୱରେ ଗଠନ ହେଇଥିବା ଏହି ଟିମ୍ ମୁଖ୍ୟତଃ ରକ୍ତଦାନ ତଥା ଶିବିର ଆୟୋଜନ, ସଡ଼କ ଦୁର୍ଘଟଣା, ଦୈବି ଦୁର୍ବିପାକ, ଅସହାୟ ମୃତ ବ୍ୟକ୍ତିଙ୍କ ସବ ସତ୍କାର, ବିଷାକ୍ତ ସାପଗୁଡ଼ିକର ଉଦ୍ଧାର ଭଳି ଅନେକ କାର୍ଯ୍ୟକ୍ରମ କରିଆସୁଛି । ତତ୍ମଧ୍ୟରେ ସାପ ଉଦ୍ଧାର କରିବା ପାଇଁ ଟିମ୍ ମଧ୍ୟରେ ଏକ ସ୍ୱତନ୍ତ୍ର ସ୍ନେକ ହେଲ୍ପଲାଇନ ଟିମ୍ ଗଠନ କରାଯାଇଛି । ବିଗତ ଚାରି ବର୍ଷ ମଧ୍ୟରେ ଫୁଲବାଣୀ ସହର ତଥା ଆଖପାଖ ଅଂଚଳରୁ ପ୍ରାୟ ୪ ହଜାରରୁ ଉର୍ଦ୍ଧ୍ୱ ବିଭିନ୍ନ ପ୍ରଜାତିର ସାପ ଏବଂ କେତେଗୋଟି ଗୋଧି ଉଦ୍ଧାର କରାଯାଇଛି । ଏପର୍ଯ୍ୟନ୍ତ ଟିମ୍ ସ୍ନେକ ହେଲ୍ପଲାଇନ ବିଭିନ୍ନ ପ୍ରଜାତି ତଥା ପାଣି ଧଣ୍ଡ, ଢମଣା, ନାଗ, ଚିତି, କଉଡ଼ିଆ ଚିତି, ରଣା, ଟ୍ରିଙ୍କେଟ, କ୍ଲିୁ, ଡାଳୁଆ ବଡ଼ା, ଅଜଗର, ବାଲିବଡା, ଲାଉ ଡଙ୍କିଆ, ପାହାଡ଼ିଆ ଚିତି ଏବଂ ମାଟି ବିରାଡ଼ି ଭଳି ବିଭିନ୍ନ ପ୍ରଜାତିର ସାପ ସୁରକ୍ଷିତ ଭାବେ ଉଦ୍ଧାର କରି ପୁନର୍ବାର ଜଙ୍ଗଲରେ ଛାଡ଼ିଛି । ଯେକୌଣସି ବ୍ୟକ୍ତି ଯଦି ସାପ ଉଦ୍ଧାର ପାଇଁ ଫୋନ୍ କରନ୍ତି ଟିମ୍ ସଦସ୍ୟ ଭି ଜଗନ୍ନାଥ ରାଜୁ, ଅନୁପ ପାତ୍ର, ଅବଦୁଲ ସାକିର, ଆଲୋକ ବିଶୋଇ, ପ୍ରଫୁଲ୍ଲ କୁମାର ପୃଷ୍ଟି ପ୍ରମୁଖ ଦିନ ହେଉ କି ରାତି ତୁରନ୍ତ ଉକ୍ତ ସ୍ଥାନକୁ ପହଂଚି ଯାଆନ୍ତି ଏବଂ ସାପଗୁଡ଼ିକୁ ସୁରକ୍ଷିତ ଉଦ୍ଧାର କରି ପୁନର୍ବାର ଜଙ୍ଗଲରେ ଛାଡ଼ି ଆସନ୍ତି । ବିଗତ ବର୍ଷ ଠାରୁ କନ୍ଧମାଳ ଜିଲ୍ଲା ଜଙ୍ଗଲ ଅଧିକାରୀ ଟିମ୍ର ସମସ୍ତ କାର୍ଯ୍ୟକ୍ରମ ଉପରେ ଅନୁଧ୍ୟାନ କରି ଟିମ୍ କାର୍ଯ୍ୟକ୍ରମକୁ ପ୍ରଶଂସା କରିଛନ୍ତି । ଟିମ୍ର ଏଭଳି ପଦକ୍ଷେପକୁ ଆହୁରି ପ୍ରୋତ୍ସାହନ ଦେବା ପାଇଁ ଟିମ୍ର କାର୍ଯ୍ୟକ୍ରମକୁ ରାଜ୍ୟସ୍ତରୀୟ ଉଚ୍ଚ ପଦାଧିକାରୀଙ୍କ ଦୃଷ୍ଟି ଆକର୍ଷଣ ପାଇଁ ପ୍ରସ୍ତାବ ଦେଇଛନ୍ତି । ଏହି ପରିପ୍ରେକ୍ଷୀରେ ରାଜ୍ୟ ସରକାରଙ୍କ ନିଷ୍ପତି କ୍ରମେ ଚଳିତ ବର୍ଷର ବିଜୁ ପଟ୍ଟନାୟକ ବନ୍ୟପ୍ରାଣୀ ସଂରକ୍ଷଣ ସମ୍ମାନରେ ସମ୍ମାନିତ ହେବାକୁ ମନୋନୀତ ହୋଇଛି ଟିମ୍ ହ୍ୟୁମାନିଟି ସ୍ନେକ ହେଲ୍ପଲାଇନ । ଚଳିତ ମାସ ୬ ତାରିଖ ଫୁଲବାଣୀ ସଦର ମହକୁମା କନ୍ଧମାଳ ଜିଲ୍ଲା ବନ ବିଭାଗ କାର୍ଯ୍ୟାଳୟରେ ହେଇଥିବା ୬୯ତମ ବନ୍ୟପ୍ରାଣୀ ସପ୍ତାହ ପାଳନ ଅନୁଷ୍ଠିତ ହୋଇଥିଲା । ଏହି ଉତ୍ସବରେ ସମ୍ମାନିତ କରାଯାଇଛି । ଆୟୋଜିତ ଉତ୍ସବରେ ଡିଏଫ୍ଓ ପ୍ରଶାନ୍ତ ପଟେଲ, ଏସିଏଫଓ ମଳୟ ରଞ୍ଜନ କୋଲ, ବାଲିଗୁଡ଼ା ଏସିଏଫ୍ଓ, ଫୁଲବାଣୀ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ, ଆଇନ୍ଜୀବୀ ବିଜୟ ପଟ୍ଟନାୟକ,ଏବଂ ଫୁଲବାଣୀ ରେଞ୍ଜର ଶିବାନନ୍ଦ ଲେଙ୍କା ଓ ବହୁ ମାନ୍ୟଗଣ ଉପସ୍ଥିତ ଥିଲେ ।
