ବଲାଙ୍ଗିର : ପିକ୍ଅପ୍ ଗାଡ଼ିରେ ଚୋରାଚାଲାଣ ହେଉଥିବା ବେଳେ ଗତକାଲି ୯୨୦ କେଜି ଗଂଜେଇ ଜବତ୍ କରିଛି ବଲାଙ୍ଗିର ଟାଉନ୍ ପୋଲିସ ।ଟାଉନ୍ ଥାନା ଆଇଆଇସି ବିଶ୍ୱଜିତ ମନବୋଧଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ କୌଣସି ବିଶ୍ୱସ୍ତ ସୂତ୍ରରୁ ଖବର ପାଇ ବଲାଙ୍ଗିର-ସମ୍ବଲପୁର ରୋଡ଼ ଯୁବୋଦୟ କଲେଜ ସାମ୍ନାରେ ଗଂଜେଇ ଚୋରାଚାଲାଣ କରୁଥିବା ଓଆର ୧୭ଜି ୫୯୧୯ ନମ୍ବର ପିକ୍ଅପ୍ ଗାଡ଼ିକୁ କାବୁ କରିଥିଲା ବଲାଙ୍ଗିର ଟାଉନ୍ ପୋଲିସ । ଏହି ଗାଡ଼ିରୁ ୯୨୦ କେଜି ଗଂଜେଇ ଜବତ୍ କରାଯାଇଥିବା ବେଳେ ଜଣେ ମହିଳା ସମେତ ୬ ଜଣ ଅଭିଯୁକ୍ତଙ୍କୁ ଗିରଫ୍ କରାଯାଇଥିଲା । ସେମାନଙ୍କ ପାଖରୁ ତିନୋଟି ବାଇକ୍,୬ ଟି ମୋବାଇଲ ଫୋନ ନଗଦ ୮୬୦୦ ଟଙ୍କା ଜବତ କରିବା ସହିତ ଉକ୍ତ ପିକ୍ଅପ୍ ଗାଡିକୁ ମଧ୍ୟ ଜବତ କରାଯାଇଥିବା ସୂଚନା ଦିଆଯାଇଛି । ଅଭିଯୁକ୍ତମାନେ ହେଲେ ଜଣେ ମହିଳା,ବଲାଙ୍ଗିର ମାଲପଡ଼ାର ପ୍ରଶାନ୍ତ କ୍ଷେତି, କଂଟାମାଲ ଥାନା ଅନ୍ତର୍ଗତ ମଲିକପଦର ନିବାସୀ ସୁନୀଲ ସାହୁ, ମନମୁଣ୍ଡାର ଚୋକା ଓରଫ୍ ସରୋଜ ଷାଣ୍ଢ ଓ ଭୁବନେଶ୍ୱର ପାତ୍ରପଡ଼ାର ସୁଶୀଲ କୁମାର ବାରିକ୍ ପ୍ରମୁଖ । ସମସ୍ତ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି । ଗଞ୍ଜେଇ ସୁବର୍ଣ୍ଣପୁର ଜିଲ୍ଲା ତରଭା ରୁ ଆସୁଥିଲା ତାକୁ ଟ୍ରେନ ଦ୍ୱାରା ରାୟପୁର ଚାଲାଣ କରିବାକୁ ଯୋଜନା ରହିଥିଲା ।
