ଗଞ୍ଜାମ : ଜଣେ ଯୁବକଙ୍କୁ ମରଣାନ୍ତକ ଆକ୍ରମଣ ଘଟଣାରେ ବୈଦ୍ୟନାଥପୁର ଥାନା ପୋଲିସ ୬ ଜଣ ଯୁବକଙ୍କୁ ଗିରଫ କରିଛି । ସେମାନେ ହେଲେ ଆଙ୍କୁଲି ଅଂଚଳର ବିକ୍ରମ ମଣ୍ଡଳ, ଚନ୍ଦନ ନାୟକ, କାହ୍ନା ସୁବୁଦ୍ଧି, ଏଲ. ଆଶିଷ କୁମାର ଦାଶ, ଗୋପାଳ ନାୟକ ଓ ମିଟୁ ବଡଜେନା । ଏ ସଂକ୍ରାନ୍ତରେ ଥାନାରେ ୪୧୯/୨୩ ରେ ଏକ ମାମଲା ରୁଜ୍ଜୁ କରି ଅଭିଯୁକ୍ତ ମାନଙ୍କୁ କୋର୍ଟଚାଲାଣ କରାଯାଇଛି ।
ଘଟଣାରୁ ପ୍ରକାଶ ଯେ, ଆଙ୍କୁଲି ମାଳିସାହିର ସମୀର ମଣ୍ଡଳଙ୍କ ଏକ ଦୋକାନ ରହିଛି । ଗତ ରାତିରେ ସମୀର ଓ ତାଙ୍କର ଦୁଇ ଜଣ ସାଙ୍ଗ ଦୋକାନରେ ବସିଥିଲେ । ବିକ୍ରମ ଓ ତାଙ୍କର ସହଯୋଗୀ ସେଠାକୁ ଯାଇ ଏମାନଙ୍କ ସହିତ ଝଗଡ଼ା କରିଥିଲେ । ଏପରିକି ବିକ୍ରମ ସମୀରଙ୍କୁ ୧୦ ହଜାର ଟଙ୍କା ଦାଦାବଟି ମାଗିଥିବା ଅଭିଯୋଗ ହୋଇଥିଲା । ସମୀର ଟଙ୍କା ଦେବାକୁ ମନା କରିବାରୁ ବିକ୍ରମ ଓ ତାର ସହଯୋଗୀମାନେ ଦୋକାନ ଭିତରେ ପଶି ସମୀରଙ୍କୁ ସଂଘବଦ୍ଧ ଭାବେ ଆକ୍ରମଣ କରିଥିଲେ । ଘଟଣା ପରେ ଅଭିଯୁକ୍ତ ମାନେ ସେଠାରୁ ଫେରାର୍ ହୋଇଯାଇଥିଲେ ।
