ଜୟପୁର : ଅସୁସ୍ଥ ଅବସ୍ଥାରେ ଭାଲୁ ଛୁଆକୁ ଉଦ୍ଧାର କରିଛି ବନ ବିଭାଗ। ଏଭଳି ଏକ ଘଟଣା ଗୁରୁବାର ଅପରାହ୍ନରେ ବୈପାରୀଗୁଡା ବନାଞ୍ଚଳ ଅନ୍ତର୍ଗତ କେନ୍ଦୁଗୁଡା ପଂଚାୟତର ଡମୁନାୟକଗୁଡା ଠାରେ ଦେଖିବାକୁ ମିଳିଛି। ଡମୁନାୟକ ଗୁଡା ପ୍ରାଥମିକ ବିଦ୍ୟାଳୟ ନିକଟରେ ଭାଲୁଛୁଆଟି ଅସୁସ୍ଥ ଅବସ୍ଥାରେ ପଡ଼ିଥିବା ପିଲାମାନେ ଦେଖିବା ପରେ ଶିକ୍ଷକଙ୍କୁ ଜଣାଇଥିଲେ। ବିଦ୍ୟାଳୟର ଶିକ୍ଷକ ଏବଂ ଗ୍ରାମବାସୀ ବନ ବିଭାଗକୁ ଏନେଇ ଖବର ଦେଇଥିଲେ । ଖବରପାଇ ସ୍ଥାନୀୟ ବନପାଳ ଲଳିତା ହରିଜନଙ୍କ ନେତୃତ୍ଵରେ ଫରେଷ୍ଟ ଗାର୍ଡ଼ ମନୋରମା ଦେବି ଏବଂ ପାରା ଷ୍ଟାଫ ଘଟଣାସ୍ଥଳରେ ପହଞ୍ଚି ଅସୁସ୍ଥ ଭାଲୁ ଛୁଆକୁ ଉଦ୍ଧାର କରିଛନ୍ତି। ଏବେ ଚିକିତ୍ସା ନିମନ୍ତେ ଭାଲୁ ଛୁଆକୁ ପ୍ରାଣୀ ଚିକିତ୍ସା କେନ୍ଦ୍ରରେ ଭର୍ତ୍ତି କରିଛି ବନବିଭାଗ।
