ନୂଆଦିଲ୍ଲୀ : କେନ୍ଦ୍ର ରସାୟନ ଓ ସାର, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡଃ ମନସୁଖ ମାଣ୍ଡଭୀୟ ଆଜି ଦେଶରେ ସାରର ଉପଲବ୍ଧତା ଏବଂ ଏହାର ବ୍ୟବହାର ଉପରେ ରାଜ୍ୟ କୃଷି ମନ୍ତ୍ରୀମାନଙ୍କ ସହ ଆଲୋଚନା କରିଛନ୍ତି । ବୈଠକରେ ସେ ନାନୋ ୟୁରିଆ, ନାନୋ ଡିଏପିର ଅଗ୍ରଗତି ଏବଂ କ୍ଷେତ୍ର ସ୍ତରରେ ବିକଳ୍ପ ସାରର ବ୍ୟବହାରକୁ ପ୍ରୋତ୍ସାହନ ଏବଂ ଏହି ଦିଗରେ ରାଜ୍ୟ ମାନଙ୍କ ଦ୍ୱାରା ଆରମ୍ଭ କରାଯାଇଥିବା ପଦକ୍ଷେପ ଗୁଡିକର ସମୀକ୍ଷା କରିଥିଲେ ।
ପ୍ରାରମ୍ଭରେ ଡଃ ମାଣ୍ଡଭୀୟ ସମସ୍ତ ରାଜ୍ୟକୁ ଅବଗତ କରାଇଥିଲେ ଯେ, ଦେଶରେ ବର୍ତ୍ତମାନ ୧୫୦ ଏଲ୍ଏମ୍ଟି ସାରର ପର୍ଯ୍ୟାପ୍ତ ଉପଲବ୍ଧତା ରହିଛି । ଏହି ମହଜୁଦ ଥିବା ସାର ଚଳିତ ଖରିଫ ଋତୁର ଧ୍ୟାନ ରଖିବା ସହିତ ଆଗାମୀ ରବି ଋତୁର ପ୍ରାରମ୍ଭିକ ବ୍ୟବହାରର ଚାହିଦା ପୂରଣ କରିବାକୁ ସୁନିଶ୍ଚିତ କରିବ ।
ମୃତ୍ତିକାକୁ ସୁରକ୍ଷିତ ରଖିବା ପାଇଁ ରାସାୟନିକ ସାରର ଅତ୍ୟଧିକ ବ୍ୟବହାର ହ୍ରାସ କରିବାର ଆବଶ୍ୟକତା ଉପରେ ଡଃ ମାଣ୍ଡଭୀୟ ମଧ୍ୟ ଆଲୋକପାତ କରିଥିଲେ । ପିଏମ୍ ପ୍ରଣାମ ଯୋଜନା ଆକାରରେ କେନ୍ଦ୍ର ସରକାର ଏକ ପଦକ୍ଷେପ ନେଇ ସାରିଛନ୍ତି ବୋଲି ସେ ଦୋହରାଇଥିଲେ । ମାଟି ମାଆକୁ ସୁରକ୍ଷିତ ରଖିବା ପାଇଁ ବିକଳ୍ପ ସାର ବ୍ୟବହାରକୁ ପ୍ରୋତ୍ସାହିତ କରିବା ନିମନ୍ତେ ଧିମା ଗତି ସମ୍ପନ୍ନ ସଲଫର କୋଟେଡ୍ ୟୁରିଆ (ୟୁରିଆ ଗୋଲ୍ଡ), ନାନୋ ୟୁରିଆ, ନାନୋ ଡିଏପି ଇତ୍ୟାଦି ପ୍ରଚଳନ କରିବା ନିମନ୍ତେ ମଧ୍ୟ ପ୍ରୟାସ ଏହା ମଧ୍ୟରେ ଅନ୍ତର୍ଭୁକ୍ତ । ରାଜ୍ୟ ସରକାର ଏହି ସଂକଳ୍ପରେ ସକ୍ରିୟ ଅଂଶୀଦାର ହେବାକୁ ଇଚ୍ଛା ପ୍ରକାଶ କରିଥିଲେ ।
ସମଗ୍ର ଦେଶରେ କାର୍ଯ୍ୟକ୍ଷମ ପିଏମକେଏସକେର ପଦକ୍ଷେପ ଉପରେ ଆଲୋଚନା ହୋଇଥିଲା ଯାହା ଗୋଟିଏ ସ୍ଥାନରେ କୃଷକ ମାନଙ୍କର ସମସ୍ତ ଆବଶ୍ୟକତା ପୂରଣ କରୁଥିବା ୱାନ୍-ଷ୍ଟପ୍-ସପ୍ ଭାବରେ କାର୍ଯ୍ୟ କରୁଛି । ଏହି ପିଏମ୍କେଏସ୍କେ ଗୁଡ଼ିକୁ ନିୟମିତ ପରିଦର୍ଶନ କରିବା ଏବଂ କୃଷକମାନଙ୍କ ମଧ୍ୟରେ ସଚେତନତା ସୃଷ୍ଟି କରିବା ନିମନ୍ତେ ସେ ସମସ୍ତ ରାଜ୍ୟର କୃଷି ମନ୍ତ୍ରୀ ଏବଂ ରାଜ୍ୟ ସରକାରଙ୍କ ଅଧିକାରୀ ମାନଙ୍କୁ ନିବେଦନ କରିଛନ୍ତି ।
କୃଷି ବ୍ୟତୀତ ଅନ୍ୟାନ୍ୟ ଉଦ୍ଦେଶ୍ୟରେ କୃଷି ନିମନ୍ତେ ଉଦ୍ଦିଷ୍ଟ ୟୁରିଆର ଅପବ୍ୟବହାର ଉପରେ ରୋକ୍ ଲଗାଇବା ପାଇଁ ମାନ୍ୟବର ମନ୍ତ୍ରୀ ରାଜ୍ୟ ଓ କେନ୍ଦ୍ରଶାସିତ ଅଂଚଳ ଗୁଡ଼ିକୁ ନିବେଦନ କରିଥିଲେ । ଏଥିସହ କୃଷି ନିମନ୍ତେ ଉଦ୍ଦିଷ୍ଟ ୟୁରିଆରକୁ ନେଇ ସମ୍ଭାବ୍ୟ ବିଭ୍ରାଟକୁ ହ୍ରାସ କରିବା ସହ ଖିଲାପକାରୀ ମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସେ ରାଜ୍ୟ ଓ କେନ୍ଦ୍ରଶାସିତ ଅଂଚଳ ଗୁଡ଼ିକୁ ସଚେତନତା ଅଭିଯାନ ଚଳାଇବାକୁ କହିଛନ୍ତି । ସୂଚନାଯୋଗ୍ୟ ଯେ, କେନ୍ଦ୍ର ସରକାରଙ୍କ ସାର ଫ୍ଲାଇଂ ସ୍କ୍ୱାଡ୍ ଏବଂ ବିଭିନ୍ନ ରାଜ୍ୟ କୃଷି ବିଭାଗର ମିଳିତ ଯାଂଚ ଆଧାରରେ ରାଜ୍ୟ ସରକାର ୟୁରିଆ ବ୍ୟବହାର ୟୁନିଟ୍ ଖିଲାପୀଙ୍କ ବିରୋଧରେ ୪୫ଟି ଏଫ୍ଆଇଆର୍ ରୁଜୁ କରିଛନ୍ତି, ୩୨ଟି ମିଶ୍ରଣ ୟୁନିଟ୍ର ଲାଇସେନ୍ସ ରଦ୍ଦ କରିଛନ୍ତି ଏବଂ ୭୯ଟି ମିଶ୍ରଣ ୟୁନିଟ୍କୁ ଅଚଳ କରିବା ସହିତ ଅତ୍ୟାବଶ୍ୟକ ସାମଗ୍ରୀ ଆଇନ ଏବଂ କଳାବଜାରୀ ନିବାରଣ ଆଇନ ଅଧୀନରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ରାଜ୍ୟ ସରକାର ମଧ୍ୟ ଏଭଳି ଦୋଷୀ ମାନଙ୍କ ବିରୋଧରେ ଜିରୋ ଟଲରେନ୍ସ (ଶୁନ୍ୟ ସହନଶୀଳତା) ର ଭାବନା ପ୍ରକାଶ କରିଛନ୍ତି ।
ବିକଳ୍ପ ସାରର ବ୍ୟବହାରକୁ ପ୍ରୋତ୍ସାହିତ କରିବା ନିମନ୍ତେ, ରାସାୟନିକ ସାରର ଅତ୍ୟଧିକ ବ୍ୟବହାର ହ୍ରାସ କରିବା ପାଇଁ ସମସ୍ତ ଆବଶ୍ୟକ ପଦକ୍ଷେପ ଗ୍ରହଣ କରିବା ନେଇ ଆଲୋଚନା ସହିତ କେନ୍ଦ୍ର ଏବଂ ରାଜ୍ୟମାନଙ୍କ ସହ ବୈଠକ ଶେଷ ହୋଇଥିଲା । ନିକଟରେ ଆରମ୍ଭ ହୋଇଥିବା ପିଏମ୍ – ପ୍ରଣାମ , ୟୁରିଆ ଗୋଲ୍ଡ, ନାନୋ – ୟୁରିଆ, ନାନୋ – ଡିଏପି ଭଳି ପଦକ୍ଷେପ ଗୁଡିକୁ କୃଷକ ସମୁଦାୟର ବୃହତ୍ତର ସ୍ୱାର୍ଥରେ ଆଶାନୁରୂପ ଫଳାଫଳ ହାସଲ କରିବା ପାଇଁ ସମାନ ସଂକଳ୍ପ ନେଇ କାର୍ଯ୍ୟ କରିବା ଉପରେ ରାଜ୍ୟଗୁଡ଼ିକ ସ୍ୱୀକୃତି ପ୍ରଦାନ କରିଛନ୍ତି ।
ବୈଠକରେ ବିଭିନ୍ନ ରାଜ୍ୟର କୃଷି ମନ୍ତ୍ରୀ, ରାଜ୍ୟ ସରକାର ମାନଙ୍କର ବରିଷ୍ଠ ଅଧିକାରୀ ଏବଂ ସାର ବିଭାଗ ଓ କୃଷି ଓ କୃଷକ କଲ୍ୟାଣ ବିଭାଗର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ ।
