ପଶ୍ଚିମ ସିଂହଭୂମି : ପଶ୍ଚିମ ସିଂହଭୂମିର ଗୋଇଲକେରାରେ ରକ୍ତମୁଖା ମାଓବାଦୀ । ଶନିବାର ବିଳମ୍ବିତ ରାତିରେ ମାଓବାଦୀମାନେ ପୋଲିସ ଇନଫର୍ମର ସନ୍ଦେହରେ ଗାଁର ଉପମୁଖିଆଙ୍କ ବୃଦ୍ଧ ଭାଇଙ୍କୁ ହତ୍ୟା କରିଛନ୍ତି । ଗୋଇଲକେରା-ଚାଇବାସା ରାସ୍ତାର ଗିତିଲପି ଛକରେ ଏହି ଘଟଣା ଘଟିଛି । ଧାରୁଆ ଅସ୍ତ୍ରରେ ଅତି ନିର୍ମମ ଭାବେ ବୃଦ୍ଧଙ୍କ ଗଳା କାଟି ହତ୍ୟା କରିଛନ୍ତି ମାଓବାଦୀ । ଘଟଣାସ୍ଥଳରୁ ଗୋଟିଏ ମାଓ ଚିଠି ଜବତ କରାଯାଇଛି ଏବଂ ଏଥିରେ ପୋଲିସ ଇନଫର୍ମର ଦର୍ଶାଯାଇଛି । ମୃତକ ରାନ୍ଦୋ ସୁରୀନ ଗୋଇଲକେରାର କଦମଡିଡା ଗାଁରେ ବାସିନ୍ଦା ଥିଲେ । କିନ୍ତୁ ସେ ନିଜ ପତ୍ନୀଙ୍କ ସହ ନକ୍ସଲ ପ୍ରଭାବିତ କୋଲ୍ହାନ ଜଙ୍ଗଲର ଲୋଭାବେଡା ବନଗ୍ରାମରେ ରହୁଥିଲେ । ଏନେଇ ପଶ୍ଚମି ସିଂହଭୂମିର ଏସପି ଆଶୁତୋଷ ଶେଖର ସୂଚନା ଦେଇଛନ୍ତି ।
ସୂଚନାଯୋଗ୍ୟ, ପ୍ରାୟ 10/12ଜଣ ମାଓବାଦୀ ନକ୍ସଲ ପ୍ରଭାବିତ ଲୋଭାବେଡା ବନଗ୍ରାମରେ ପହଞ୍ଚି ତାଙ୍କୁ ଉଠାଇ ନେଇଥିଲେ । ଏବଂ ଗିତିଲପି ହାଟ ଛକରେ ତାଙ୍କ ଗଳା କାଟି ହତ୍ୟା କରିଥିଲେ । ରବିବାର ସକାଳେ ଖବର ପାଇ ପୋଲିସ ଓ ସିଆରପିଏଫ ଘଟଣାସ୍ଥଳରେ ପହଞ୍ଚିଥିଲେ । ପରିବାର ଲୋକଙ୍କ ଅନୁଯାୟୀ, ବୃଦ୍ଧ ଜଣକ ଲୋଭାବେଡାରୁ କୁଇଡା ହାଟ ଏବଂ ସେଠାରୁ କଦମଡିହା ନିଜ ଗାଁକୁ ଯାଇଥିଲେ । ତେବେ ନିଜ ଘର ଲୋଭାବେଡା ଫେରିବା ପରେ ତାଙ୍କୁ ମାଓବାଦୀମାନେ ଉଠାଇ ନେଇ ହତ୍ୟା କରିଥିଲେ ।
