ଗୋରଖପୁର : ସହଜନବା ଥାନା ଅନ୍ତର୍ଗତ ବରଇପାର ଗ୍ରାମରେ ଥିବା ଏକ ବାଣ କାରଖାନାରେ ଶନିବାର ରାତିରେ ବିସ୍ଫୋରଣ ଘଟିଛି । ବିସ୍ଫୋରଣର ଶବ୍ଦ ଏତେ ଜୋରଦାର ଥିଲା ଯେ, ଏହି ପ୍ରଚଣ୍ଡ ଶବ୍ଦ ପରେ କାରଖାନା ଓ ଏହାର ଆଖପାଖ ଅଂଚଳରେ ଲୋକଙ୍କ ଭାଗଦୌଡ଼ ଦେଖିବାକୁ ମିଳିଥିଲା । ତେବେ ଏହି ବିସ୍ଫୋରଣ ସମୟରେ କାରଖାନାରେ କେହି ନଥିବା ଜଣାପଡିଛି । ଏ ସମ୍ପର୍କରେ ଖବର ପାଇ ଦମକଳ ବାହିନୀ ଓ ସହଜନବା ଥାନା ପୋଲିସ ଘଟଣାସ୍ଥଳରେ ପହଂଚି ୧ ଘଂଟାର ଅକ୍ଲାନ୍ତ ପରିଶ୍ରମ ପରେ ନିଆଁକୁ ଆୟତ କରିଥିଲେ । ତେବେ ଏଥିରେ କେହି ମୃତାହତ ହୋଇନାହାଁନ୍ତି । କାରଖାନା ନିକଟରେ ଥିବା ବିଦ୍ୟୁତ ଟ୍ରାନ୍ସଫର୍ମରରୁ ନିଆଁ ଲାଗିଥିବା ଆଶଙ୍କା କରାଯାଉଛି ।
